Top

15

ፌስቡክ፣ ትዊተር እና ዩትዩብ በብሪታንያ እና ፈረንሳይ ከበድ ያለ ቅጣት ሊጣልባቸው ነው

Tuesday 13th of June 2017 07:05:11 AM  |  Fana Technology

ፌስቡክ፣ ትዊተር እና ዩትዩብ በብሪታንያ እና ፈረንሳይ ከበድ ያለ ቅጣት ሊጣልባቸው ነው

አዲስ አበባ፣ ሰኔ 6፣ 2009 (ኤፍ.ቢ.ሲ) ፌስቡክ፣ ትዊተር እና ዩትዩብ የወንጀል እና ፅንፈኝነት ይዘት ያላቸውን መልዕክቶች ባለማስወገዳቸው በብሪታንያ እና ፈረንሳይ የበርካታ ሚሊየን ፖውንድ ቅጣት ይጠብቃቸዋል ተባለ።

በፈረንሳይ ዛሬ ጉብኝት የሚያደርጉት የብሪታንያ ጠቅላይ ሚኒስትር ቴሬዛ ሜይ ከፕሬዚዳንት ኢማኑኤል ማክሮን ጋር በሚኖራቸው ቆይታ በማህበራዊ ሚዲያዎች የሚታየው ፅንፈኝነት ዋነኛ የመነጋገሪያ አጀንዳ እንደሚሆን ተገልጿል።

ሁለቱ መሪዎች ይፋ ያደርጉታል ተብሎ በሚጠበቀው አዲስ ህግ፥ በማህበራዊ ሚዲያዎቹ ገፆች ላይ የሽብር ፕሮፖጋንዳዎችን ጨምሮ ተቀባይነት የሌላቸው ህገወጥ ይዘቶች ከተገኙ ከበድ ያለ ቅጣት ይጣልባቸዋል ተብሏል።

ቴሬዛ ሜይ በፓርላማ ምርጫው ወግ አጥባቂ ፓርቲያቸው አብላጫ ድምፅ ካጣ በኋላ የመጀመሪያ የውጭ ሀገር ጉብኝታቸውን ዛሬ በፓሪስ ያደርጋሉ።

ጠቅላይ ሚኒስትር ሜይ ወደ ፓሪስ ከማምራታቸው በፊት “ኢንተርኔት የሽብር እና ወንጀሎች ምቹ ምህዳር እንዳይሆን ተባብረን መስራት አለብን” ብለዋል።

ባለፈው ወር በማንቸስተር ከደረሰው የቦምብ ጥቃት በኋላ የቡድን ሰባት አባል ሀገራት (አሜሪካ፣ ብሪታንያ፣ ካናዳ፣ ጃፓን፣ ፈረንሳይ፣ ጀርመን እና ጣሊያን) እንደ ጎግል እና ፌስቡክ ባሉ ኩባንያዎች ላይ የሚጫኑ “አደገኛ” ይዘቶችን ለማጥፋት እና በኩባንያዎቹ ላይ ጠንከር ያለ እርምጃ ለመውሰድ መስማማታቸው ይታወሳል።

የብሪታንያ እና ፈረንሳይ የደህንነት ተቋማት ጠንካራ መሆናቸው ቢታወቅም ከፕሬዚዳንት ማክሮን ጋር በኦንላይን ሚዲያዎች የተደቀኑ የሽብር ስጋቶችን ለመቅረፍ ተጨማሪ ስራ ለማከናወን ተስማምተናልም ነው ያሉት ጠቅላይ ሚኒስትሯ።

ለንደን እና ፓሪስ በኦንላይን ሚዲያዎች የሚለቀቁ ጥላቻን የሚሰብኩ እና ፅንፈኝነትን የሚያጎለብቱ ይዘቶች በሚወገዱበት መንገድ ዙሪያ ከቴክኖሎጂ ኩባንያዎች ጋር በቅርብት እንደሚሰሩም ገልፀዋል።

በቴክኖሎጂ ኩባንያዎቹ ቅጣት ከማሳለፋችን በፊት መጥፎ ይዘቶችን በተጫኑ ቅፅበት የሚያስወግድ ስርዓትን በጋራ ለመዘርጋት እንሰራለን ብለዋል ሜይ።

በዚሁ ጉዳይ የብሪታኒያ የሀገር ውስጥ ደህንነት ሚኒስትር አምበር ሩድ ከፈረንሳይ አቻቸው ጋር በቀጣዩ ሳምንት ተገናኝተው ይመክራሉ።

የብሪታንያ ፓርላማ በቅርቡ ባወጣው ሪፖርት የቴክኖሎጂ ኩባንያዎቹ በድረ ገፆቻቸው ላይ የተለጠፉ ፅንፈኝነትን የሚሰብኩ ይዘቶችን በሚጠበቀው ልክ ባለማስወገዳቸው የጥላቻ ወንጀሎች እየተበራከቱ መጥተዋል።

የጀርመን ፍትህ ሚኒስቴር ህገወጥ ይዘቶችን በማያስወግዱ ኩባንያዎች ላይ እስከ 50 ሚሊየን ዩሮ የሚደርስ ቅጣት ለማሳለፍ የሚያስችል እቅድ እያወጣ መሆኑ ተሰምቷል።

 

 

ምንጭ፦ http://news.sky.com/

 

 

 


በፋሲካው ታደሰ

                   


Save for Later/ በኋላ ለማንበብ ያስቀምጡ
   
Up vote :15     Down vote :0     Ajeb vote :15





    Ajebnew Email

    Subscribe to ajebnew email for daily, weekly and/or monthly feeds and everything worth your time will be right in your inbox!










    WE ARE STORYTELLERS. BE SURE TO NEVER MISS ANYTHING.