NEWS /

Top

20

366 ኪሎ ግራም የሚመዝነው ሜክሲኳዊ ለሁለተኛ ጊዜ ከተደረገለት ቀዶ ህክምና እያገገመ ነው

Friday 24th of November 2017 01:40:07 PM  |  Fana News

366 ኪሎ ግራም የሚመዝነው ሜክሲኳዊ ለሁለተኛ ጊዜ ከተደረገለት ቀዶ ህክምና እያገገመ ነው

አዲስ አበባ፣ ህዳር 15፣ 2010 (ኤፍ ቢ ሲ) በአንድ ወቅት የዓለማችን ወፍራሙ ሰው ተብሎ የነበረውና በአሁኑ ወቅት 366 ኪሎ ግራም የሚመዝነው ሜክሲኳዊ ለሁለተኛ ጊዜ ከተደረገለት ቀዶ ህክምና እያገገመ ነው ተብሏል።

ለሁለተኛ ጊዜ የሆድ ቀዶ ህክምናውን አካሂዶ ክትትል እያደረገለት የሚገኘው ማዕከል እንዳስታወቀው፥ ሜክሲኳዊው ወፍራሙ ሰው ክብደቱን ካለበት ወደ 200 ኪሎ ግራም ለማውረድ ያስችላል ተብሎ እየተጠበቀ ነው።

በአንድ ወቅት አስደንጋጭ በሆነ ሁኔታ 595 ኪሎ ግራም ክብደት የነበረው የ33 ዓመቱ ሁያን ፔድሮ ፍራንኮ፥ ከአንድ ዓመት በፊት ክብደቱን የመቀነስ መርሃ ግብር በመጀመር አሁን ያለውን ክብደት ወደ 366 ኪሎ ግራም ዝቅ አድርጓል።

ፍራንኮ በዚህ ሳምንት በምስራቃዊቷ ዛፖፓን ከተማ ውስጥ ባደረገው ቀዶ ህክምና ፥ ክብደቱ ቢያንስ በ120 ኪሎ ግራም እንደሚቀንስለት ተስፋ ሰንቋል።

በመሆኑም ቀዶ ህክምናው በጥሩ ሁኔታ እንደተደረገለት የገለፁት የቀዶ ጥገናው ባለ ሙያ ጆስ አንቶንዮ ካስታኔዳ፥ ከዚህ በኋላ ክብደቱ እንደሚቀንስ ሙሉ ተስፋ አለን ነው ያሉት።

በዚህም በሚቀጥሉት ጥቂት ቀናት ውስጥ ፍራንኮ ከሃኪም ቤቱ ሊወጣ እንደሚችል ተናግረዋል።

የፍራንኮን ውፍረት ለመቀነስ ከጨጓራው ላይ የተወሰነ መጠን መቀነስ ወሳኝ ሆኖ በመገኘቱ ነው ቀዶ ህክምና የተከናወነለት።

ይህ ቀዶ ህክምና ውጤታማ ከሆነ ታካሚው ለስኳር በሽታ እና ለከፍተኛ የደም ግፊት የሚወስዳቸው መድሃኒቶች ማቆም ይችላል ተብሏል።

በተጨማሪም በሰባት ዓመታት ለመጀመሪያ ጊዜ ሙሉ በሙሉ መንቀሳቀስ እንደሚችል ተጠቁሟል።

ታካሚው ለረጅም ጊዜ ከፍተኛ ጭንቀት እንደነበረበት ቢገልፅም አሁን ተስፋ እንዳለው ተገንዝቧል።

"ከመጀመሪያው ቀዶ ህክምና ጋር ሲነጻጸር ይበልጥ ፈርቼ ነበር፥ ሆኖም ለህይወቴ ቅድሚያ መስጠት ካለብኝ ሁለተኛውን ቀዶ ሕክምና ማድረግ እንደሚገባኝ ተረድቼ ነው ህክምናውን ያከናወኑልኝ" ብሏል።

በፈረንጆቹ 2016 ታህሳስ ወር፥ 595 ኪሎ ግራም ክብደት የነበረው ፍራንኮ የዓለማችን ወፍራሙ ሰው በመባል በዓለም ድንቃድንቅ መዝገብ ስሙ መስፈሩ ይታወሳል።

ከዚህ በፊት በ2007 ሌላው ሜክሲኳዊ ማኑኤል ኡሪቤ የዓለም ወፍራሙ ሰው ክብረ ወሰንን በ597 ኪሎ ግራም ክብደት ይዞ የነበረ ቢሆንም ባሳለፍነው የፈረንጆቹ ዓመት ከዚህ ዓለም በሞት ተለይቷል።

 

ምንጭ፦ ሲ.ጂ.ቲ.ኤን.

                   


Save for Later/ በኋላ ለማንበብ ያስቀምጡ
   
Up vote :20     Down vote :0     Ajeb vote :20





    Ajebnew Email

    Subscribe to ajebnew email for daily, weekly and/or monthly feeds and everything worth your time will be right in your inbox!










    WE ARE STORYTELLERS. BE SURE TO NEVER MISS ANYTHING.