NEWS /

Top

20

አየር መንገዱ ወደ ሶስት ከተሞች የሚያደርገውን የበረራ ምልልስ የሚያሳድግ ስምምነት ተፈራረመ

Wednesday 21st of September 2016 08:47:14 AM  |  Fana News

 አየር መንገዱ ወደ ሶስት ከተሞች የሚያደርገውን የበረራ ምልልስ የሚያሳድግ ስምምነት ተፈራረመ

 የኢትዮጵያ አየር መንገድ ወደ ኪንሻሳ፣ ሉሙምባሺና ጎማ ከተሞች በሳምንት የሚያደርገውን የበረራ ምልልስ ማሳደግ የሚያስችል ስምምነት ከዲሞክራቲክ ሪፐብሊክ ኮንጎ ጋር ተፈራረመ።

ስምምነቱ ኢትዮጵያና ዲሞክራቲክ ሪፐብሊክ ኮንጎ ከአራት ዓመት በፊት የተፈራረሙትን የአየር አገልግሎት ስምምነት አቪዬሽን ከደረሰበት ደረጃና ከወቅቱ የገበያ ሁኔታ አንፃር የተሻሻለ ነው።

ሁለቱ ወገኖች በመካከላቸው ያለውን የአየር አገልግሎት አስመልክተው ከመስከረም 3 ቀን 2009 ዓ.ም. ጀምሮ ለሁለት ቀናት አዲስ አበባ ላይ ባደረጉት ድርድር ነው የተሻሻለውን ስምምነት የተፈረመው።

በስምምነቱ መሰረት የኢትዮጵያ አየር መንገድ ለመንገደኛ አገልግሎት በሳምንት ወደ ኪንሻሳ የሚያደርገውን 10 በረራ ወደ 12፣ የሉሙምባሺን ስድስት በረራም ወደ ወደ ሰባት ከፍ ያደርገዋል።

በሳምንት ሶስት ጊዜ ወደ ጎማ ከተማ ሲያደርግ የቆየውን በረራም ወደ አምስት ያሳድገዋል።

የኪንሻሳ በረራ ከመጪው የፈረንጆች የበጋ ወራት ጀምሮ በሳምንት ከ12 ወደ 14 ከፍ እንዲል የሚደረግ መሆኑን የኢትዮጵያ ሲቪል አቪዬሽን ባለሥልጣን የላከው መግለጫ ጠቁሟል።

በተጨማሪም ለሦስቱም መዳረሻዎች በሳምንት ሰባት ጊዜ የሚያደርገውን የጭነት በረራ ምልልስ ለእያንዳንዱ መዳረሻ በሳምንት ሰባት በረራ በማድረግ ወደ 21 ያሳድገዋል ብሏል።

ስምምነቱ የቡሩንዲ መዲና በሆነችው ቡጁምቡራ ላይ ተጥሎ የነበረው የ5ኛ ትራፊክ መብት ክልከላ እንዲነሳ የሚፈቅድ በመሆኑ ጠቀሜታው ከፍ ያለ መሆኑን የባለሥልጣኑ መግለጫ አመልክቷል።

ይህም አየር መንገዱ በሁለተኛው የዕድገትና ትራንስፎርሜሽን ዕቅድ ዓለም ዓቀፍ መዳረሻዎቹን ለማስፋት ያስቀመጠውን ግብ ለማሳካት ግብዓት ከመሆኑ ባሻገር የአገራቱን የንግድ፣ የኢንቨስትመንትና የቱሪዝም ፍሰት ለማሳደግ ጉልህ ሚና እንዳለው ተጠቅሷል።

ስምምነቱን በኢትዮጵያ በኩል የባለሥልጣኑ ዋና ዳይሬክተር ኮሎኔል ወሰንየለህ ሁነኛው፣ ዲሞክራቲክ ኮንጎን በመወከል ደግሞ የአገሪቱ የትራንስፖርትና መገናኛ ሚኒስትር የአቬዬሽን አማካሪ ኸርነስት ኢላኝዋ ቦናያ ፈርመዋል።

 ምንጭ፦ ኢዜአ

                   


Save for Later/ በኋላ ለማንበብ ያስቀምጡ
   
Up vote :20     Down vote :0     Ajeb vote :20





    Ajebnew Email

    Subscribe to ajebnew email for daily, weekly and/or monthly feeds and everything worth your time will be right in your inbox!










    WE ARE STORYTELLERS. BE SURE TO NEVER MISS ANYTHING.