NEWS /

Top

20

የወርቅ ማንጠሪያ ኩባንያ ኢትዮጵያ ውስጥ ለማቋቋም ድርድር እየተካሄደ ነው

Friday 24th of November 2017 03:05:08 PM  |  Fana News

የወርቅ ማንጠሪያ ኩባንያ ኢትዮጵያ ውስጥ ለማቋቋም ድርድር እየተካሄደ ነው

አዲስ አበባ ፣ ህዳር 15 ፣ 2010 (ኤፍ ቢ ሲ) የወርቅ ማንጠሪያ ኩባንያ ኢትዮጵያ ውስጥ ለማቋቋም ከቻይናው መንግስታዊ ኩባንያ ጎልድ ግሩፕ ጋር ድርድር እየተካሄደ ነው።

ከወርቅ ዘርፍ በመጠንም ሆነ በውጭ ምንዛሪ እየተገኘ ያለው ገቢ እየቀነሰ መምጣቱን ተከትሎ መንግስት በዘርፉ ላይ በርካታ ማሻሻያዎችን እያደረገ ስለመሆኑ ተናግሯል።

በቅርቡም የኢትዮጵያ ብሄራዊ ባንክ ዝቅተኛ የወርቅ አምራቾች ያመረቱትን ወርቅ ለህገ ወጥ ንግድ እንዳይዳርጉት፥ ዝቅተኛውን የወርቅ ቅበላ አቅም ከ150 ግራም ወደ 50 ግራም በማውረድ ማሻሻያ ማድረጉ ይታወሳል።

ከዚህ ባለፈም በ2004 ዓ.ም አቋርጦት የነበረውን በአለም አቀፍ ዋጋ ተሰልቶ አቅራቢዎች ላቀረቡት ወርቅ፥ በወሩ ከፍተኛ ዋጋ ተሰልቶ እንዲከፈላቸው የሚያደርገውን አሰራር መልሶ ጀምሯል።

ይህ ሁሉ ቢሆንም ግን ኢትዮጵያ ወርቅን እያስቀለጠች ያለችው ወደ ስዊዘርላንድ በመላክ ነው፤ ይህ መሆኑ ደግሞ ሃገሪቱን ለከፍተኛ ወጪ ይዳርጋታል።

ይህን ለመተካትም ከሁለት አመት በፊት የጀርመንና የስዊዘርላንድ ጥምር ኩባንያ ከሆነ ድርጅት ጋር የወርቅ ማንጠሪያ ኢትዮጵያ ውስጥ ለማቋቋም ድርድር ተደርጎ ብዙም መጓዝ አልተቻለም።

የማዕድን ነዳጅና ተፈጥሮ ጋዝ ሚኒስትር ዲኤታ አቶ ቴዎድሮስ ገብረእግዚአብሄር፥ አሁን መንግስታዊ ከሆነው የቻይና ድርጅት ጎልድ ግሩፕ ጋር በኢትዮጵያ ወርቅ ማንጠሪያ እንዲከፍት ድርድር እየተደረገ ነው።

ድርድሩ በዋናነት የብቸኛ ኩባንያ መብትና የአካባቢ ጥበቃ ላይ ያተኮረ መሆኑንም ተናግረዋል።

ወርቅ የማንጠር ስራ ሲሰራ የተለያዩ የኬሚካል ውጤቶች ጥቅም ላይ ስለሚውሉ የአካባቢ ጥበቃ ወጪው በጎልድ ግሩፕ ወይስ በኢትዮጵያ መንግስት ይሸፈን በሚለው ጉዳይ ላይም የመደራደሪያ ነጥብም አለ ብለዋል።

ከዚህ ባለፈም ኩባንያው የሚያነጥረው ወርቅ ኢትዮጵያ ውስጥ ያለውን ብቻ ነው ወይስ ከሌሎች ሀገራት ወርቅን አስገብቶ ያመርታል የሚል መደራደሪያ እንዳለበትም አንስተዋል።

ሆኖም ድርድሩ በሂደት ላይ ያለ ስለሆነ የትኛው ወገን ምን አይነት አቋም እንደያዘ መናገሩ ይቆይ ብለውናል ሚኒስትር ዲኤታው፤ ሂደቱ ሲያልቅ ውጤቱን እንደሚገለጽ በመጥቀስ።

አሁን ድረስ ይህ ስራ የሚሰራው ስዊዘርላንድ በመሆኑ ኢትዮጵያም ይህን አይነት ኩባንያ ማግኘቷ ለወርቅ ዘርፍ ተጠቃሚነቷ ከፍተኛ ሚና እንዳለውም ያነሳሉ።

ወርቅን ውጭ ሀገር ወስዶ ማሰራት በተለያየ መጠን ተመሳሳይ ክፍያ ይጠይቃል ያሉት ሚኒስትር ዲኤታው፥ 250 ግራምም ሆነ አምስት ኪሎ ግራም ለማስቀለጥ 250 የአሜሪካ ዶላር እንደሚጠይቅ ይገልጻሉ።

ከዚህ አንጻርም የወርቅ ማንጠሪያ ኩባንያውን ከፍቶ ወጭን መቀነስ አስፈላጊ መሆኑንም ነው ሚኒስትር ዲኤታው የተናገሩት።

 

 


በካሳዬ ወልዴ

                   


Save for Later/ በኋላ ለማንበብ ያስቀምጡ
   
Up vote :20     Down vote :0     Ajeb vote :20





    Ajebnew Email

    Subscribe to ajebnew email for daily, weekly and/or monthly feeds and everything worth your time will be right in your inbox!










    WE ARE STORYTELLERS. BE SURE TO NEVER MISS ANYTHING.