HEALTH /

Top

20

ተገቢ ያልሆኑ የሰራተኛ አያያዞች ሰራተኞች ህግጋትን እንዳያከብሩ ይገፋፋሉ - ጥናት

Monday 19th of June 2017 10:10:05 AM  |  Fana Health

ተገቢ ያልሆኑ የሰራተኛ አያያዞች ሰራተኞች ህግጋትን እንዳያከብሩ ይገፋፋሉ - ጥናት

አዲስ አበባ፣ ሰኔ 12፣ 2009 (ኤፍ.ቢ.ሲ) በስራ ገበታቸው ላይ መልካም ያልሆነ አያያዝ የሚገጥማቸውና በግለሰቦች ስሜታዊ ውሳኔ የሚጎዱ ሰዎች ወደ ቤታቸው ከተመለሱ በኋላም ከቤተሰቦቻቸው ጋር መልካም ግንኙነት አይኖራቸውም።

ይህም በስራ ቦታ ያጋጠሙ አሉታዊ ጫናዎችን በማስታወስ፥ በቤት ውስጥ ለልጆች፣ ለትዳር አጋር አልያም ለሌላ የቤተሰብ አባል መልካም እይታ እንዳይኖራቸው ያደርጋል፡፡

ጠንካራ ሰራተኞች በከፍተኛ የስራ ጫና እንዲሁም ባልተገቡ ውሳኔዎች ውስጥ የስራ ቀናቸውን የሚያሳልፉ ከሆነ፥ በቤተሰባቸው ህይወት ላይ አሉታዊ ጫና ይፈጥራል፡፡

በስራ ቦታ ያለ አግባብ የተተቹ፣ ዘለፋ የደረሰባቸው እና የበታችነት ስሜት እንዲሰማቸው የሚደረጉ ሰራተኞች፥ ወደ ቤታቸው ከተመለሱ በኋላ የደረሰባቸውን በደል በማስታወስ መጥፎ ስሜታቸውን በቤተሰብ ላይ ሊሰነዝሩ እንደሚችሉ የፍሎሪዳ ዩኒቨርሲቲ የስነ ልቦና ተመራማሪዎች ያደረጉት ጥናት ያሳያል።

በቢሮ ውስጥ ስነ ምግባር ወይም ደንብን የሚጥሱ ተገቢ ያልሆኑ የሰራተኛ አያያዞች ካሉ ሰራተኞች ህግጋትን እንዳያከብሩ ይገፋፋሉ፡፡

ይህ ደግሞ ስርዓት አልበኝነትን በማምጣት የአመራር ሂደቱን በስሜት ብቻ የሚመራ እንዲሆን እና ውድቀት እንዲገጥመው ያደርጋል ነው ያሉት ተመራማሪዎቹ።

ሰራተኞች በግለሰቦች ስሜታዊ ውሳኔ እየተረበሹ እና ስራቸውን በአግባቡ ሳይሰሩ ከዋሉ ወደ ቤታቸው ሲመለሱ መጥፎ ስነ ምግባርን እንዲያንፀባርቁ እንደሚያደርግም ገልፀዋል።

ጥናቱ ሰራተኞች መልካም ስነ ምግባር እንዲኖራቸው፥ ሚዛናዊ የቢሮ ህግጋት እና ደንቦችን በጋራ ማውጣት፣ ለሰራተኞች እረፍት መስጠት፣ ሃላፊ ወይም ሌሎች የስራ ባልደረቦች መሰረተ ቢስ ዘለፋን እና ትችቶችን ማስወገድ እንደሚገባቸው አመላክቷል።

ስሜታዊ ውሳኔዎችን በሚሰጠው አካል ላይ ህጋዊ እርምጃ መውሰድ እና ሰራተኞች ስራቸው ላይ ብቻ እንዲያተኩሩ ማድረግም ተገቢ ነው ይላል ጥናቱ።

ከዚህም ባሻገር ከእቅዳቸው ውጭ የስራ መደራረቦች ሲኖሩ የቅርብ ሃላፊ ወይም የስራ ባልደረቦቻቸው እየተጋገዙ በፈቃደኝነት መስራት ይኖርባቸዋል የሚለው ተነስቷል።

ሆኖም ሰራተኞች በቢሮ ውስጥ ጥሩ ያልሆነ ውሎ ሲያጋጥቸው፥ በቀጥታ ወደ ቤታቸው ከመሄዳቸው በፊት አዝናኝ ተግባራትን ማከናወን፣ ወደ ቤት ከሄዱ በኋላም በቂ እረፍት መውሰድ እና እንቅልፍ መተኛት ከቤተሰብ ጋር የሚኖርን ግንኙነት መልካም ለማድረግ መልካም መሆኑ ተመክሯል።

ምንጭ፦ ሳይኮሎጂ ቱደይ

                   


Save for Later/ በኋላ ለማንበብ ያስቀምጡ
   
Up vote :20     Down vote :0     Ajeb vote :20





    Ajebnew Email

    Subscribe to ajebnew email for daily, weekly and/or monthly feeds and everything worth your time will be right in your inbox!










    WE ARE STORYTELLERS. BE SURE TO NEVER MISS ANYTHING.