FUN /

Top

20

ገንዘቤ ዲባባ በሎዛን ዳይመንድ ሊግ በ3000 ሜ. የውድድር ስፍራውን ሪኮርድ በመስበር አሸነፈች

Friday 26th of August 2016 02:34:59 PM  |  Ethio Tube

14163805_10154485516213637_850604435_o.j

የ2016 ዳይመንድ ሊግ 11ኛ መዳረሻ በሆነችው የስዊዘርላንዷ ሎዛን ከተማ ትላንት ምሽት ሲካሄድ በ3000ሜ. ኢትዮጵያዊቷ ገንዘቤ ዲባባ የውድድር ስፍራውን ሪኮርድ በማሻሻል አሸናፊ ለመሆን በቅታለች፡፡ ሶስት የውድድር ስፍራ ሪኮርዶች በተሻሻሉበት 41ኛው የአትሌቲስማ ፉክክር በወንዶች አያንለህ ሱሌይማን በ1000ሜ. እና ሳም ሄንድሪክስ በምርኩዝ ላይ ከገንዘቤ ሌላ ሪኮርድ ያሻሻሉ አትሌቶች ሆነዋል፡፡

ገንዘቤ ዲባባ ከውድድሩ በፊት የተሰጣትን የአሸናፊነት ግምት እውን ባደረገችበት የሎዛን ዳይመንድ ሊግ የሴቶች 3000ሜ. ውድድር ላይ የሪዮ ኦሊምፒክ የሴቶች 5000ሜ. የብር ሜዳልያ ባለቤት ኬንያዊቷ ሔለን ኦቢሪ እና የሀገሯ ልጅ ሜርሲ ቼሮኖ የገንዘቤ ተፎካካሪዎች ነበሩ፡፡ ኬንያውያኑ አትሌቶች እስከመጨረሻው ዙር ተከትለዋት መጓዝ ቢችሉም ገንዘቤ የመጨረሻውን ዙር የሄደችበት ፍጥነት ግን ሊቋቋሙት ያልቻሉት ሆኖ ውድድሩን 8፡31.84 በሆነ አዲስ የውድድሩ ስፍራ ሪኮርድ ሰዓት በቀዳሚነት ለማጠናቀቅ አብቅቷታል (ገንዘቤ የመጨረሻውን ዙር የሸፈነችው በ57.47 ሰከንድ ነበር)፡፡ ገንዘቤ ያሻሻለችው የውድድር ስፍራው ሪኮርድ ቪቪያን ቼሪዮት በ2010 ካስመዘገበችው በሶስት ሰከንድ የተሻለ ነው፡፡ አብዛኞቹ ተወዳዳሪዎች ከሪዮ ኦሊምፒክ ድካም ያልተላቀቁ እንደመሆኑ አልማዝ አያና የዘንድሮው የዳይመንድ ሊግ ውድድር ዶሀ ላይ ሲጀመር በ3000ሜ. ያስመዘገበችውን የወቅቱ ፈጣን የሆነ 8፡23.11 ሰዓት ማሻሻል የሚጠበቅ ነገር አልነበረም፡፡ ኬንያውያኑ ሔለን ኦቢሪ (8፡33.96) እና ሜርሲ ቼሮኖ (8፡34.49) ሁለተኛ እና ሶስተኛ ወጥተዋል፡፡ ኢትዮጵያዊቷ ሀፍታምነሽ ተስፋዬ በ9፡11.29 አስረኛ ሆና አጠናቃለች፡፡ ገንዘቤ ከውድድሩ በኋላ በሰጠችው አስተያየት ‹‹ይህ ውድድር በተለይም በመጨረሻው ዙር ላይ የነበረኝ ፍጥነት ለዚህ የውድድር ዘመን ቀሪ ግዜ በራስ የመተማመን ስሜቴን ከፍ የሚያደርግልኝ ይሆናል›› ብላለች፡፡

14088947_10154485516063637_524481311_n.j

በሎዛን በተደረጉ ሌሎች ፉክክሮች የዳይመንድ ሊጉ አካል ባልነበረው የወንዶች 100ሜ. ጃማይካዊው አሰፋ ፓዎል በ9.96 ሰከንድ፣ በ200ሜ. ኔዘርላንዳዊው ቹራንዲ ማርቲና የሀገሩ አዲስ ብሔራዊ ሪኮርድ በሆነ 19.81 ሰከንድ፣ በ400ሜ. ላሽዋን ሜሪት በ44.50 ሰከንድ፣ በ3000ሜ. መሰናክል ኬንያዊው አብርሀም ኪቢዮት በ8፡09.58 ካሸነፉት መካከል የሚጠቀሱ ናቸው፡፡ ጅቡቲያዊው አያንለህ ሱሌይማን በሪዮ ኦሊምፒክ ካስመዘገበው ጥሩ የማይባል ውጤት በኋላ በ1000ሜ. የርቀቱ የዓለም የምንግዜም ምርጥ ሰዓቶች ዝርዝር በአምስተኛ ደረጃ ላይ በሚቀመጥ 2፡13.49 የሆነ ሰዓት የሎዛን ዳይመንድ ሊግ አሸናፊ ሆኗል፡፡ የአያንለህ ሰዓት የዳይመንድ ሊግና የውድድር ስፍራው ሪኮርድ እንዲሁም የወቅቱ ፈጣን ሆኖ የተመዘገበም ነው፡፡ በምርኩዝ ዝላይ አሜሪካዊው ሳም ኬንድሪክስ የዓለም ሪኮርድ ባለቤቱ ፈረንሳዊ ሬኖ ላቪሌኒዬን ጭምር በመብለጥ የውድድር ስፍራው አዲስ ሪኮድ በሆነ 5.92 ሜትር አንደኛ ወጥቷል፡፡

 

በሴቶች 100ሜ. ጃማይካዊቷ የሪዮ ኦሊምፒክ የርቀቱ ሻምፒዮን ኤላዪኔ ቶምፕሰን በ10.78 በበላይነት አጠናቃለች፡፡ የኦሊምፒክ ሻምፒዮኗ ካስተር ሴሜኒያ ባልነበረችበት የሴቶች 800ሜ. ፉክክር የብሩንዲዋ ፍራንሲኔ ኒዮንሳባ በ1፡57.71 ስታሸንፍ ኬንያዊቷ ኢዩንስ ሳም (1፡58.41) እና የግሬት ብሪቴይኗ ሊንዚ ሻርፕ (1፡58.52) ሁለተኛ እና ሶስተኛ ሆነው አጠናቀዋል፡፡ በዚህ ውድድር ላይ ተካፋይ የነበረችው ኢትዮጵያዊቷ ሀብታም አለሙ በ2፡00.46 ስድስተኛ ሆና ጨርሳለች፡፡

                   


Save for Later/ በኋላ ለማንበብ ያስቀምጡ
   
Up vote :20     Down vote :0     Ajeb vote :20





    Ajebnew Email

    Subscribe to ajebnew email for daily, weekly and/or monthly feeds and everything worth your time will be right in your inbox!










    Top Voted Sources


    WE ARE STORYTELLERS. BE SURE TO NEVER MISS ANYTHING.